बैल पोळा - यशवंत आणि राजेंद्र गिरधारी

     बैल पोळ्या निमित्त हि कविता 

शिंगे रंगविली, बाशिंगे बांधली
चढविल्या झुली, ऐनेदार

राजा परधान्या, रतन, दिवाण
वजीर, पठाण, तुस्त मस्त

वाजंत्री वाजती, लेझिम खेळती
मिरवीत नेती, बैलांलागी

                                                                                       चित्रकार 
                                                                                  राजेंद्र गिरधारी     
                                                                               द लोणार एक्सप्रेस 
                                                                    www.lonarexpress.blogspot.com


डुल-डुलतात, कुणाची वशिंडे
काही बांड खोंडे, अवखळ

कुणाच्या शिंगाना, बांधियले गोंडे
हिरवे तांबडे, शोभिवंत

वाजती गळ्यांत, घुंगरांच्या माळा
सण बैलपोळा, ऐसा चाले

झुलींच्या खालती, काय नसतील
आसूडांचे वळ, उठलेले ?

आणि फुटतील, उद्याही कडाड
ऐसेच आसूड, पाठीवर

जरी मिरविती, परि धन्याहाती
वेसणी असती, घट्ट पाहा

जरी झटकली जराशीहि मान
तरी हे वेसण खेचतील

सण एक दिन, बाकी वर्षभर
ओझे मरमर, ओढायाचे ! 


                                                                      कवी
                                                                 - यशवंत
                                                           द लोणार एक्सप्रेस 
                                              www.lonarexpress.blogspot.com